TAARIFA YA WAISLAM KUFIKISHWA MAHAKAMANI...Hii hapa!!

Huyu ni mmoja kati ya wafuasi wa Sheikh Ponda aliekamatwa kwenye maandamano ya kutaka Ponda aachiwe October 17 2012.

Jumla ya waumini 50 wa Dini ya Kiislamu, ambao ni wafuasi wa Sheikh ISSA PONDA pamoja na yeye mwenyewe, leo wamefikishwa katika mahakama ya hakimu mkazi Kisutu, kujibu kesi ya wizi wa mali na uvamizi wa Ardhi inayowakabili.
Washitakiwa hao 50 kwa pamoja wanakabiliwa na Mashitaka Manne, yakiwemo ya kula njama kwa nia ya kutenda kosa kinyume cha sheria, kuingia kwa nguvu kwa lengo la kutaka kutenda makosa, kumiliki kwa nguvu ardhi ya Kampuni ya AGRI-TANZA, wizi wa matofali 1,500, na kokoto tani 36 vyote vikiwa na thamani ya shilingi milioni 56.6.
Wakili mwandamizi wa Serikali TUMAINI KWEKA, amesema kuwa pamoja na makosa hayo manne, mtuhumiwa namba moja Sheikh ISSA PONDA anakabiliwa na shitaka jingine la Tano, la uchochezi wenye nia ya kutaka kutenda kosa.
Akisoma mashitaka hayo mbele ya Hakimu Mkazi Mfawidhi STEWART SANGA, wa Mahakama ya Haklimu mkazi Kisutu, aliyemuwakilisha Hakimu Mkazi Mfawidhi VICTORIA NONGWA ambaye yupo kwenye Semina, Wakili KWEKA ameitaka mahakama itoe masharti magumu kwa washitakiwa 49, ili watakapotoka wasirejee kwenda kutenda makosa.
Kwa upande wa mshitakiwa wa kwanza Sheikh PONDA, Wakili KWEKA amesema kwamba Mwendesha mashtaka Mkuu wa Serikali DPP ELIEZA FERESHI, ameiandikia mahakama kuitaka kutompatia dhamana mshitakiwa huyo, kutokana na sababu za Kiusalama na Maslahi ya Jamuhuri, jambo ambalo limepingwa na wakili wa washitakiwa JUMA NASSORO, aliyetaka kuainishwa kwa sababu zaidi za kutotaka dhamana hiyo.

October 17 2012 (Picha kutoka fullshangwe.blogspot.com)

Licha ya kupinga agizo hilo la DPP pia Wakili NASSORO ameiomba mahakama, kumlegezea masharti mshitakiwa mwenye umri mkubwa kuliko washitakiwa wote, aliyemtaja kwa jina la ZAIDA YUSUPH mwenye umri wa miaka 100, kutokana na hali yake ya kiafya.
Kabla ya uamuzi wa Hakimu, Wakili KWEKA ameiambia mahakama kuwa haina uwezo kisheria wa kupinga maagizo yaliyotolewa na DPP, hivyo ombi la wakili wa washitakiwa haliwezi kufanyiwa kazi.
Baada ya maelezo ya mawakili hao, Hakimu STEWART SANGA amesema hawezi kusikiliza ombi lolote wala kutoa maamuzi, kutokana na kutokuwepo kwa hakimu mwenye dhamana ya kusikiliza kesi hiyo, na hivyo kuwataka watuhumiwa wote kurudi Rumande mpaka Novemba Mosi, ambapo kesi hiyo itatajwa tena.
Sheikh PONDA aliwasili katika viwanja vya mahakama ya Kisutu majira ya Saa sita na dakika ishirini, akiwa chini ya ulinzi mkali wa polisi, ambapo kesi ilianza kusomwa na kudumu kwa zaidi ya saa moja, huku ndugu wa washitakiwa wakiwepo nje kusubiri hatma ya ndugu zao.

Habari na Millardayo Blog